NU

La mama a marang e myit ru myit tsang lam ni pru wa shagu Nu a ga hkaw gaw nye a matu myit shalan ya ai.

masha gaw kaja ai sha nlu ai zawng n kaja ai hkrai mung nlu ai yaw shingra maka gaw yawng hpe rap rap ra ra hpang da ai re. Maga mi na gaw nden ja ai ni sha awng dang ma ai ngai ai.

Masha ni ngai hpe NU hte grai bung ai nga ma ai. Dai majaw mung NU ngai hpe grai tsaw ra ai hku re. NU a marang e ngai myi man pa myi man lu ai. Raitim nye a marang e NU myiprwi pru ga sai.

NU gaw ga law law n tsun ai, bungli hte sha sakse madun ai wa re. NU gaw jawng sarama mung re. Putao kaw jawng sarama galaw nga ai teng Wa hte dinghku de nna an nau ni manga hpe shangai shaprat wa ai. NU yen Wa gaw hkrang n bung ai majaw jahkring hkring ahtik ahtawk bying ma ai.

NU gaw myit grai kadun ai wa mung re. Nta lit hpe shi sha lit la ai. Nta masha yawng hta mung shi shawng jau rawt ai. Moi kaji teng hta, myit ga ai gaw, NU hpe myit n kadun shangun mayu ai. NU myit kadun yang Wa hte galaw, nrai yang an nau ni hta katut ai. Ya gaw NU hpa majaw myit kadun ai hpe chyena sai hku re.Hpa mu bungli-bungsi hpe mung ti nang nan galaw dat yang she myit dik ai wa, law la ai mu bungli-bungsi a jaw pu ba ai myit ni gaw NU hpe myit kadun ai hku ngai dai ni mu mada ai hku re.

Masha lam gaw ganawng yu yang she chye ai da. Moi gaw myit hkrum myit bung ai ngu zawn nawn laiwa tim, hking teng na wa ai marang e langai lam langai grai chye wa ai hku re .Dai hte mareng myit ru myit tsang ni pru wa shagu NU a ngung jaw ga ni gaw ngye a myit ni hpe simsa sha ngun ai.

Ngai sha e mungkan ntsa hta myit atang ahpa re ai masha grai law ai, mu bungli ni hta mung ntsa lam sha galaw ai ni hte mung hkrum na re, shaloi myit daw myit ru na re.
Ndai dinghku hta pyi NU gaw grai ahkyak la nna galaw ai, pawt ai teng hta pawt, myit ru ai teng hta myit ru. Dai hte sha prat gaw htum mat na re. dai majaw ngai sha e nang hpe nju ai ni hpe mung myit hkum tsang, manawn masham re ai wa hpe mung hkum pawt. Lam htum, hpang jahtum hta shi shi bying ma na re ngu tsun ai.

NU gaw shi tsaw ra ai jawng sarama mu bungli hpe kauda nna an nau ni a shawng lam a matu ap nawng mat wa ai. Dai ni an nau ni yawng janmau lu la ai hpe mu mat wa sai.NU gaw gawng shingyan tsawm htap na hpe myit madung nda ai. Shing re ai majaw NU n tsawm ai ngu myit yang shut mat na yaw. Moi NU naw kaji teng kayet da ai sumla mu shaloi ngai pyi ram ram mau mat ai.Ram ram tsawm ai.Dai majaw rai na re NU Wa hte galaw shagu, nang ngai hpe lu la ai grai gamkaja ai ngu tsun ai hpe bai myit dum lu ai.
Tsawm htap ai hpe nsharawng aung ai zawng malu masha hpe mung grai nga nna madung nda ai wa re. Nga ai hpa hte sha rai tim myit dik let chye sha shangut ai.Dai majaw NU ayan tsun ai ga gaw ngai matsan kum la nang rawng ai re.

NU gaw hpa mu bungli hpe mung lawang ladan galaw ai wa re.Galaw ai magam yawng mung bai nhtang yu nra hkra kang ka htep lahti re ai.An nau ni hpe mung kaji teng kaw na nta bungli ni hpe garan galaw shangun ai.Jawng dat teng hta nta shawng kaw gat dut shangung let gumhpraw a manu hpe sharing ya ai.

An nau ni myit nsu nna NU grai pawt tim shana yup teng NU a kyuhpyi laman hta an nau ni yawng hpe mying gang let shaman ai mung NU sha re.
Dai ni NU an nau ni hpe kau da ai 2 ning jang na mat sai.Rai tim NU hte seng nna nye a myit hta ka mayu ai ni grai naw nga ai.Ya teng hta gaw ngai na salum kata hta NU a shingna hpe myit dum shingran mu nga ai.

NU a majaw ngai arawng lu ai zawng nye a marang e, NU tut e arawng lu nga na matu shakut ra na re. NU hta grau ai kasha bying yang she NU myit dik na re yaw ngai sha e nga ai ga hpe tut dum let ngai kasha shakut nga ngai. Rai tim NU hpe dep na matu gaw grai naw shakut ra na hku re.